2
فرانسوي چارواکو خبر ورکړی چې په دغه هیواد کې یې یو افغان د ترهګرۍ او د یو مشکوک برید د طرحه کولو په تور نیولی دی.
د یاد هیواد رسنیو د امنیتي چارواکو له قوله راپور ورکړی چې نیول شوی افغان ۲۲ کلن دی او د فوټبال په لوبغالي یا یو سوداګريز مارکېټ کې د خلکو په نښه کولو پلان درلوده چې امنیتي ځواکونو نیولی دی.
سرچینو زیاته کړې چې له نوموړي سره دوه نور شکمن کسان هم نیول شوي وو، خو له څیړنو وروسته بیرته خوشې شوي دي.
راپور کې د چارواکو له قوله زیاته شوې چې له نیول شوي کس یې داسې شواهد ترلاسه کړي چې له داعش ډلې سره اړیکې لري.
له دې یوه اوونۍ وړاندې په امریکا کې هم یو بل افغان د دغه هیواد په راتلوونکو ولسمشریزو ټاکنو کې د ترهګریز برید د پلان په تور نیول شوی و.
