د ملګرو ملتونو د بشري مرستو همغږۍ اداره«اوچا» ویلي چې، د افغانستان په بیلابیلو سیمو کې یې د بشري مرستو په برخه کې د طالبانو د لاسوهنې له کبله خلکو ته د اړینو مرستو رسولو چارې له خنډ سره مخ شوي دي.
اوچا د جرمني خبري اژانس ته ویلي دي چې، د روان کال په سپټمبر کې د بشري مرستو رسوونکو ادارو د هغو ۱۷۳ پېښو راپور ورکړی چې د مرستو رسولو چارې یې د طالبانو د لاسوهنې او مداخلې له کبله اغېزمنې شوي دي.
د یادې ادارې د مالوماتو له مخې په دې پېښو کې بشري فعالیتونو په برخه کې د طالبانو بېځایه لاسوهنې، د مرستندویه مؤسسو د کارونو محدودول او پر کارکوونکو د تاوتریخوالي پېښې شاملې دي.
یادې ادارې زیاته کړې چې د طالبانو د یادو خنډونو له کبله په دغه هیواد کې ځينو مرستندویه مؤسسو د ۸۳ پروژو چارې ځنډولي او یا یې خپل کارونه محدود کړي دي.
که څه هم د طالبانو حکومت تراوسه د اوچا د یادې ادعا په اړه غبرګون نه دی ښودلی، خو له دې وړاندې له نړیوالې ټولنې غوښتنه کړې چې له دغه هیواد دې خپلې مرستې نه سپموي
