په کابل کې د سیاسي چارو شنونکي جاوید کوهستاني کورنۍ له رسنیو سره په خبرو کې ویلي، چې کوهستاني له زندان ازاد او خپلې کورنۍ ته ستون شوی دی.
د کوهستاني د کورنۍ غړو ویلي نوموړی له ۲۰ ورځني زندان وروسته(سه شنبه،د تلې۲۴مه)د طالبانو له زندانه خوشې شوی دی.
تراوسه د کوهستاني د نیولو لامل څرګند نه دی او نه هم روښانه شوې چې د کومو شرایطو پر اساس له زندان خوشې شوی دی.
بلخوا طالب چارواکو هم تراوسه په دې اړه رسنیو ته څه نه دي ویلي.
د مالوماتو له مخې د طالبانو استخباراتو جاوید کوهستاني د تلې په ۴مه نېټه د کابل ښار د ۱۷مې ناحیې اړوند د شمالي سرای په سیمه کې نیولی و او تراوسه په زندان کې و.
جاوید کوهستاني په افغانستان کې یو له مهمو سیاسي شنونکو له ډلې څخه و.
واک د طالبانو په رسیدو سره پر سیاسي چارو شنونکو او دغه راز پر رسنیو محدودیتونه زیات شوي، چې له همدې کبله ګڼ هغه یې د طالبانو له لوري زنداني شوي دي.
